Gjennom Rocket Man gir Astrid ungdomar ein ny arena for meistring

Fritidstilbodet i Sogn har dei siste åra fått eit nytt og kjærkoment tilskot. Med låg terskel og høg trivselsfaktor har Rocket Man på kort tid etablert seg som eit populært tilbod for dei unge.

Målet til Rocket Man er å skape trygge møteplassar, der ungdom kan oppleve meistring, byggje relasjonar og finne tilhøyrsle på tvers av bakgrunn og erfaring.

Luster kommune var tidleg ute, då dei blei med i prosjektet i 2023. No har også nabokommunen Sogndal tatt steget, med Astrid Torsvik som nytilsett prosjektleiar i spissen.

Meistring gjennom nye opplevingar

Eit viktig mål er å introdusere ungdom for nye aktivitetar dei kanskje aldri har prøvd før.

– For nokon kan det vere første gong på skateboard. For andre kan det vere klatring, paddel eller gamingkveldar, seier Torsvik

– Mange ungdomar oppdagar at dei er utruleg flinke i ting dei aldri har prøvd før. Det handlar ikkje om å vere best, men om å prøve, oppleve og meistre noko nytt.

Trygge vaksne og ekte relasjonar

Med på laget har Torsvik eit solid team av unge aktivitetsguidar, fleire med bakgrunn frå friluftsliv, vernepleie eller helsefag.

– Guidane møter ungdomane med leik og humor, og byggjer relasjonar som minner om ei trygg storesøster eller ein storebror. Her er det lov å vere akkurat den ein er, seier Torsvik.

Samarbeid som gjer aktivitet mogleg

Ein viktig del av modellen til Rocket Man er tett samarbeid med lokalsamfunnet, som skular, ungdomslos, Røde Kors og Sogn Friluftsråd.

– Me tek ansvar for køyring og praktisk tilrettelegging av aktivitetane i samråd med familien, så terskelen for å delta skal vere lågast mogleg. Mange aktivitetar blir gjennomført til svært låg kostnad, eller gratis, fordi aktørar i lokalsamfunnet stiller opp. Det handlar om å få ting til å skje saman, seier Torsvik.

Bygd på tillit og langsiktig arbeid

Rocket Man har vakse fram til å bli eit etablert, nasjonalt tilbod på kort tid. Oppstarten i Sogn krevde mykje arbeid med finansiering og organisering, men støtta frå lokale aktørar gjorde det mogleg å kome godt i gang.

No er tilbodet i vekst, med ventelister og aukande interesse frå fleire kommunar i regionen.

– Det tek tid å etablere solide relasjonar og me ønskjer å vekse sakte. Me har kome for å bli.

– Ler så me grin saman

Rocket Man handlar om gode kvardagar, og Torsvik er tydeleg på at gleda går begge vegar.

– Det beste er å vere saman med ungdomane og sjå at dei trivst. Det gir oss like mykje som det gir dei, me ler så me grin i lag, avsluttar Torsvik.