Nokre brukarar må stadfeste identiteten sin på nytt i BankID-appen

Brukarar av BankID-appen som ikkje tidlegare har skanna pass eller nasjonalt ID-kort i appen, må no gjennomføre ei ny identifisering.

Strengare krav til tryggleik

BankID gjev tilgang til mellom anna helsetenester og offentlege digitale løysingar, og har det høgaste tryggingsnivået i EU. For å sikre at BankID-en faktisk vert brukt av rett person, må nokre brukarar no dokumentere identiteten sin på nytt.

Du vil få melding direkte i appen når det er din tur.

Gjeld dette deg?

Har du allereie skanna pass eller nasjonalt ID-kort i BankID-appen, treng du ikkje gjere noko. Personar med utanlandsk pass og personar under 18 år treng heller ikkje gjennomføre kontrollen no – det vert jobba med ei eiga løysing for desse gruppene.

Kva må du gjere?

ID-kontrollen vert gjennomført ved at du skannar pass eller nasjonalt ID-kort i BankID-appen. På denne måten kan me kople saman deg som person og din BankID. Når det er din tur, finn du rettleiing direkte i appen. 

Det er likevel lurt å vere førebudd:

• Sørg for at du har gyldig norsk pass eller nasjonalt ID-kort tilgjengeleg.
• Oppdater BankID-appen til siste versjon via Google Play eller Apple App Store.
• Treng du hjelp undervegs, kan du be nokon du stolar på om assistanse.

For meir informasjon, sjå BankID sine heimesider.